Ævintýri Stínu Siggu

Fleiri fiskar!

2007-05-27T15:30:00.000+02:00

Þessi færsla er nú aðallega fyrir Davíð og Ylfu svo þau sjái hvernig Finnboga og Brian reiðir af á nýjum vígstöðum.

Eins og sjá má virðast Guttormur og Gottfreð hafa tekið þessari nýju viðbót vel. Snati sýnir anti-social hegðun, eins og sannri ryksugu sæmir, og heldur sig að mestu bakvið dæluna.

Kominn tími til!

2007-05-24T23:13:00.000+02:00

Ætli það sé ekki komin tími á smá bull enda margt búið að gerast síðan ég skrifaði síðast og sumir farnir að saka mann um bloggleti. Ég fór til Köben í byrjun apríl og hitti þar mömmu auk þess sem að pabbi var með okkur í bláendanum af ferðinni. Maggi kláraði síðan prófið sitt um miðjan apríl og byrjaði í praktík í Árósum þannig að núna brunum við hjónin saman þangað á hverjum degi sem þýðir að ég er búin að missa einokunarvaldið sem ég hafði yfir útvarpinu í bílnum!

Ingi skáfrændi kom til okkar í helgarheimsókn í byrjun maí og fóru frændurnir saman í innkaupaleiðangur niður í bæ þar sem elsku bíllinn okkar tók upp á því að bila á miðjum gatnamótum. En þeir nenntu nú ekki að stressa sig mikið yfir því heldur hringdu bara á Falck og skelltu sér svo á barinn.

Í skálinni á borðinu er að finna það nýjasta sem Maggi hefur fangað í garðinum okkar en það er froskur sem er búinn að dunda sér þar síðustu vikurnar. Við höfum ekki komið okkur í það að "sleppa" honum aftur út í náttúruna því að hann virðist vera aðeins fatlaður greyið en erum nú samt ekki til í að halda hann sem gæludýr enda getum við ekki tekið við öllu sem kemur úr garðinum. Þetta fer að verða vandræðalegt, það er farið að kalla Magga Dagfinn dýralækni!

Um síðustu helgi fórum við í helgarferð til Köben og fengum þar góða gistingu hjá Kristínu og Fabian en þar gistu líka Alfreð, Björk og Pétur.

Pési prakkari tók vel á móti okkur þegar við komum.

Myndarlegir feðgar

Fabian með aðaltöffarana í Köben - Alexandre og Pétur!

Björk, Pétur og Maggi spennt að vera komin í Tívolí þrátt fyrir smá rigningu.

Á laugardagskvöldið fórum við síðan að sjá útskriftarsýningu Ylfu og Davíðs "True love" en það var nú megintilgangur ferðarinnar.

Pétur stóð sig vel í að vekja Magga á morgnana.

Eins og sjá má reynum við Pétur alltaf að vera í stíl! :-)

Síðast þriðjudag vorum við boðin í grill til Söruh og Jakobs en í því fólst að Maggi þurfti að sjá um grillmennskuna - Sophie fylgdist þolinmóð með hvort eitthvað mundi detta af.

Sarah fylgdist líka vel úr eldhúsglugganum

en Emma bara skríkti og hló á meðan þessu stóð.

Jakob kom svo tímanlega heim - þegar eldamennskan var búin!

Stína Poppins

2007-04-06T15:35:00.000+02:00

Ég brá mér í barnapíu-hlutverk um daginn og passaði dóttur Söruh, rúsínuna hana Emmu.

Og svo til að auka við ábyrgðina þá var ég líka að líta eftir hvolpunum hennar Sophie sem hún eignaðist fyrir 2 mánuðum. Þeir voru 6 en það er búið að selja einn núna og hinir verða seldir núna á næstu dögum.

Fyrst voru þeir mjög rólegir en þegar ég kíkti út í garð til þeirra þá færðist fjör í leikinn

Og ekki batnaði það þegar móðirin blandaði sér í málin.

Við spáðum mikið í að taka einn af hvolpunum en ákváðum á endanum að við hefðum ekki nógu mikinn tíma núna til að sinna því en það var erfitt að sleppa því þar sem þeir eru alveg hrikalega sætir!

Brussels baby!

2007-04-04T12:17:00.000+02:00

Ferðin til Brussel var frábær og ég skemmti mér alveg konunglega. Við Linda lögðum í hann á laugardeginum og gistum eina nótt í Köben í góðu yfirlæti hjá Davíð og Ylfu þó við náðum því miður ekki að eyða miklum tíma með þeim. Vöknuðum síðan snemma á sunnudagsmorguninn til að fara út á Kastrup þar sem beið okkar lengsta tjékk-inn röð sem ég hef séð þar en við náðum nú öllu á góðum tíma.

Hér erum við Ane sama dag og við komum til Brussel. Eins og sjá má var svolítið kalt að sitja úti en við létum okkur hafa það.

Það var mikið af fallegum gömlum byggingum í miðbænum.

Flesta dagana fengum við reyndar alveg brilljant veður – sólskin og hlýtt.

Tuperna, Linda, Ane og Jannie að slappa af.

Ég og Linda í European Council. Vegna manneklu vorum beðnar um að taka að okkur að vera staðgenglar fyrir Austurríki og Búlgaríu :-)

Við fórum og skoðuðum þessa byggingu sem kallast Atomium og var byggt fyrir heimssýninguna 1958.

Linda á leiðinni upp á milli kúla.

Við fórum út að borða á hverju kvöldi, alltaf á nýja veitingastaði. Hér má sjá hluta af hópnum (Ane, Tuperna, ég, Mai, Anna, Jannie, Linda (íslenska) og Linda (danska)) á grískum veitingastað þar sem við þóttum svo skemmtilegar að við vorum beðnar um að koma aftur kvöldið eftir (sem við gerðum reyndar ekki).

Í heildina litið var þetta alveg stórskemmtileg ferð í fallegri borg sem kom mér á óvart með fjölbreytileika sínum. Mér fannst ég læra mikið á því að fara í þessar heimsóknir, sérstaklega European Council, European Commission og European Parliament í stað þess að lesa bara um það í þurrum skruddum. Hostelið sem vorum á var betra en ég átti von á og ekki skemmdi fyrir að við Linda fengum eina 2ja manna herbergið, allir hinir voru í 4ja eða 6 manna herbergjum og fengum við því viðurnefnið prímadonnurnar. En við tókum bara þá stefnu að standa undir þeim titli! Heimferðin var ekki eins skemmtileg því ég var orðin veik og var skjálfandi úr kulda í lestinni til Horsens og var það því grár og gugginn sjúklingur sem Maggi tók á móti á lestarpallinum.

Hamingjan!

2007-03-09T12:08:00.000+01:00

Langt síðan maður hefur bloggað, kannski af því að það hefur lítið verið að gerast og því lítið til að blogga um. Samt finnst mér tíminn líða svo hratt hér, í mínum huga er þessi vorönn bara rétt byrjuð en kennararnir eru strax farnir að minna okkur á prófin og hvernig við eigum að undirbúa okkur fyrir þau. Þrátt fyrir að mér finnist fögin sem ég er í núna skemmtilegri og áhugaverðari heldur en ég var í fyrir jól er einhvern veginn svo dimmt yfir mörgu í skólanum. Það er kannski af því að það hafa svo margir af samnemendum mínum hætt og farið aftur til síns heimalands. Það sem byrjaði síðasta haust sem mjög alþjóðlegur og fjölbreyttur hópur er nú orðinn frekar einsleitur og samanstendur af nokkrum Dönum, 3 Íslendingum, nokkrum fyrrum Austantjalds-búum og 1 Kínverja. Þó að ég hafi nú trú á því að það muni lifna yfir þessu þá er ég samt farin strax að spá í hvað muni taka við þegar ég er búin í náminu. En ég ætti kannski ekki að vera að eyða of miklum tíma í að hugsa um það heldur bara njóta tímans núna því framtíðin mun alltaf koma hvernig svo sem hún verður.

Ég rakst einmitt á þetta á netinu um daginn og ég held að það sé ágætt að hafa þetta að leiðarljósi.

“Lengi vel fannst mér alltaf sem lífið væri rétt að byrja – þetta eina sanna líf. En það var alltaf eitthvað sem stóð í vegi fyrir því, eitthvað sem þurfti að yfirstíga fyrst, einhver ókláruð mál, tími sem þurfti að eyða í eitthvað, ógreiddar skuldir. Síðan myndi lífið byrja. Dag einn rann það upp fyrir mér að allar þessar hindranir voru lífið sjálft.”

Alfred. D Souza

En það þýðir nú samt ekki að maður geti ekki hlakkað til skemmtilegra hluta sem munu gerast í framtíðinni, til dæmis eins og það að ég er orðin mjög spennt fyrir Brussels-ferðinni sem ég fer í eftir 2 vikur og svo auðvitað að hitta mömmu í Köben í næsta mánuði :-)

Ég veit ekki alveg af hverju ég er svona heimspekileg í dag en það gæti kannski tengst söknuði eftir elskulegum eiginmanni en hann er núna í námsferð í Köben en kemur nú aftur heim í dag.

Og svona í lokin set ég inn eina mynd af mér og Jóhönnu skvís sem var tekin á þorrablótinu í síðasta mánuði, þar var mikið fjör og góður matur. Ég vil taka það fram að þetta er ekki þreyta sem er að hrjá okkur skvísurnar þarna (þó við lítum kannski smá þreytulega út), við erum bara að hvíla okkur aðeins eftir matinn!

Tómlegt í kotinu

2007-02-07T17:31:00.000+01:00

Alfreð, Björk og Pétur komu til okkar á sunnudaginn og fóru svo frá okkur í dag og er núna mjög tómlegt í húsinu hjá okkur enda var Pétur þrátt fyrir smæð sína búinn að leggja undir sig stóran hluta af því.

Pétur mættur á svæðið og kominn í náttfötin.

Maggi fór með liðið í skoðunarferð um Árósa meðan ég var í skólanum en ég hitti þau síðan þegar ég var búin í tímum.

Pétri finnst sveskjumauk gott.....

... alveg hrikalega gott!!

Það er alltaf gott að stripplast aðeins...

Síðasta laugardag fórum við til Óðinsvéa að hjálpa Albert og Siggu við flutning en þau eru nú flutt aftur á landið kalda.

Strákarnir að gera sig klára fyrir átökin

Allt að gerast!

Síðasta myndin af Danmerkur-deild buslugengisins

Svo var smá Söru-knús í lokin

Komin upp til að anda!

2007-01-29T22:38:00.000+01:00

Ok, kannski smá dramatískt en þannig leið mér á þriðjudaginn þegar ég kláraði síðasta prófið. Þessar rúmlegu 3 vikur sem fóru í að skrifa 2 lokaritgerðir voru alveg að gera út af við mig og svo er núna er bara tekin við bið að sjá hvernig gekk í þessum blessuðu kúrsum.
Annars höfðum við það rosalega gott um jólin, hittum fullt af fólki, fórum í matarboð, út að borða, átum yfir okkur (að sjálfsögðu – það voru jólin), fengum fullt af góðum gjöfum og reyndum svo að læra þegar tími gafst til. En aðaltímaþjófurinn má segja að hafi verið litla gullið hann Róbert frændi enda fær maður nú aldrei nóg af því að knúsa hann.

Litla krúsidúllan

Fórum í frábært matarboð hjá Álfheiði á Holtsgötunni

Kíktum í heimsóknir í Núpalindina þar sem var í boði góður matur, góðir drykkir og misgóð spilamennska!

Ragna og Ágústa komu í heimsókn til að kveðja okkur og þá varð Róbert alveg hugfanginn af Ágústu sem fannst nú ekki leiðinlegt að fá svona athygli.

Við eyddum síðan áramótunum í Óðinsvéum hjá Albert, Siggu og Söru Bergdísi ásamt Hjalta, Jóhönnu og Leonóru og höfðum við það rosalega gott þar þrátt fyrir að það gætti smá slappleika hjá Magga um kvöldið.

Allir að drífa sig út til að skjóta upp flugeldum

Spennan í hámarki....

... þó voru sumir spenntari en aðrir!

Annars höfum við haft nóg að gera núna í janúar fyrir utan lærdóminn. Fyrir 2 vikum var haldið partý hjá Nonna, skólafélaga Magga, og Soffíu konu hans fyrir alla Íslendinga sem eru á sömu önn og Maggi því fljótlega mun hópurinn splittast upp þegar hann fer í praktík út um allar trissur. Á síðasta þriðjudag hitti ég bekkinn minn í Árósum til að fagna próflokum. Ég hélt að þetta yrði nú bara smá hittingur með nokkrum bjórum þar sem þetta væri í miðri viku en úr þessu varð heljarinnar skrall og var ég alveg að til kl. 4 um nóttina. Þá er nú gott að eiga góða að eins og hana Lindu mína sem ljáði mér gistingu hjá sér. Síðasta helgi var síðan gönguhelgin mikla, Sophie hundurinn hennar Söruh var í pössun hjá okkur og var farið með hana í göngutúra víðsvegar um bæinn þó aðallega hér um Stensballe.

Um næstu helgi verður síðan nóg að gera, Brussels-partý á föstudaginn í Árósum, á laugardaginn munum við renna til Óðinsvéa að hjálpa Albert og Siggu að hlaða í gáminn þar sem þau eru að flytja aftur á klakann og um kvöldið erum við að fara í fertugsafmæli hjá skólafélaga Magga. Svo á sunnudaginn koma Alfreð, Björk og Pétur að heimsókn til okkar í 3 nætur – hlakka svo til að hitta þau!

Jóla hvað?

2006-12-16T08:45:00.000+01:00

Það er nú alveg hrikalega krúttlegt að fyrsta sem ég sá þegar ég fór á klósettið í morgun var “múmbútts” út í glugga. Sara Bergdís gisti hjá okkur í nótt ásamt foreldrum og ákvað hún að baðherbergisglugginn væri sá aðgengilegasti fyrir jólasveininn til að setja í skóinn hennar. Hún var víst búin að láta hann vita að hún yrði ekki í Óðinsvéum í nótt.

Ég fór í próf í fyrradag í Nordic perspectives og það hefði nú alveg mátt ganga betur en það verður víst bara að hafa það. Dagurinn í dag verður tekinn í afslöppun og svo verður hafist handa við ritgerðarskrif í næstu viku. Síðan er aldrei að vita nema við hjónakornin skellum okkur í smá ferðalag út fyrir bæjarmörkin á morgun. :-)

Tilgangslaust sjálfspróf

2006-11-29T21:54:00.000+01:00

Rakst á þetta sniðuga próf á bloggi gamals vinnufélaga um hvaða tónlist verður spiluð í epísku stórmyndinni með sjálfævisögulegu ívafi sem ég mun framleiða, leikstýra og leika aðalhlutverið.
1. Opnaðu spilarann sem þú notar (iTunes, Winamp, Media Player, iPod, etc)

2. Settu á shuffle

3. Ýttu á spila(play)

4. fyrir hverja spurningu seturðu það lag sem er að spilast

5. Þegar þú ferð í næstu spurningu, ýtirðu á next takkann fyrir næsta lag.

6. Ekki svindla og þykjast vera kúl settu inn hvaða lag kemur…

*********ÆVINTÝRI STÍNU SIGGU***************

Opening Credits: Are you gonna be my girl - Jet
Waking: Now I´m here - Queen
First Day At School: Holding out for a hero – Bonnie Tyler
Falling In Love: The great gig in the sky – Pink Floyd
Fight Song: The Sign – Ace of Base (alveg hrikalegt barráttulag!!)
Breaking Up: Okkar nótt – Sálin hans Jóns míns
Prom: She´s a rebel – Green day
Getting Back Together: Hand in my pocket – Alanis Morrisette
Birth of Child: How deep is your love – Bee Gees
Final Battle: In the Name of the Father – Bono & Garvin Friday
Death Scene: Freak out – Avril Lavigne (jamm, á vel við....)
Funeral song: I´m a greedy man – James Brown (hmmm.... persónan mín verður örugglega rík í sögunni...)
End Credits: Wanted Man – Johnny Cash

Já það sem maður gerir ekki þegar maður á að vera að læra, tilgangslaus sjálfspróf koma greinilega sterk inn!

Síðasta fimmtudag fór ég í jólapartý hjá danskri skólasystur minni þar sem allir áttu að koma með þjóðlega jólarétti og litlar jólagjafir því farið var í pakkaleik að dönskum sið sem er öðruvísi heldur en var á litlu jólunum þegar maður var í barnaskóla því þessi leikur fólst í því að kasta teningi og þegar maður fékk sexu þá gat maður stolið pakka frá hinum. Á tímabili var ég komin með 3 pakka en þegar tíminn var útrunninn þá endaði ég einungis með einn. Við fórum síðan nokkur saman niður í miðbæ þar sem fjörið hélt áfram og ég fékk síðan að gista hjá Lindu vinkonu.
Þrátt fyrir að vera búin að fara í jólapartý þá er ég nú ekki komin í neitt jólaskap, það kannski stafar af því að það er ekki mjög jólalegt úti. Oftast er rigning hérna og hitastigið á bilinu 7-10 gráður en maður ætti nú ekki að kvarta yfir því þegar maður heyrir hvernig veðrið er búið að vera á Íslandi. Einnig held ég að ég muni hafa lítinn tíma til að komast í jólaskap því að hátíðarnar þetta árið verða undirlagðar af ritgerðarskrifum. Ég fer í eitt munnlegt próf eftir 2 vikur og síðan eru það 2 ritgerðir sem á að skila í janúar. Ég fæ síðan nokkra daga frí í janúar (en þá lýkur haustönninni hjá mér) en til að toppa þetta verður eiginmaðurinn í fríi fyrstu vikuna í febrúar þegar vorönnin byrjar hjá mér þannig að það verður lítið um sameiginlegt frí hjá okkur þetta árið.
Að lokum vil ég síðan óska elsku bestu mömmu til hamingju með afmælið í dag. Þrátt fyrir að hún sé orðin tvöföld amma þá er nú ekki að sjá á henni að hún eldist neitt! :-)

Sundmót, smábæjarferð, skírn.....hvað eru mörg s í því?

2006-11-09T16:06:00.000+01:00

Fyrstu helgina í október fékk ég að upplifa smá nostalgíu en þá keppti ég á Norðurlandamóti garpa sem var haldið í Óðinsvéum og synti þá m.a.s. greinar sem ég synti mjög sjaldan þegar ég var á “hápunkti” sundferils míns. Alltaf er maður jafnstressaður þegar maður er að fara að synda, þessar örfáu sekúndur þegar maður stígur upp á pallinn og bíður eftir startskotinu verða að mörgum mínútum þegar allar hugsanirnar fljúga í gegnum kollinn á manni: ,,Ætli sundgleraugun detti af mér? Ætli sundhettan rifni? Passa sig að þjófstarta ekki! Ætli ég nái að klára sundið? Af hverju fannst mér þetta góð hugmynd þegar Albert stakk upp á þessu fyrir 3 mánuðum? Hvað er ég að gera hérna?!” En svo ríður skotið af og maður stingur sér út í laugina og einhvern veginn nær maður alltaf að klára þetta sómasamlega (enda voru þetta nú engin langsund sem ég var að synda!!) og alltaf er þetta jafngaman þegar maður er búinn enda var þetta alveg stór-skemmtilegur Íslendingahópurinn sem var að keppa. Það var svo sameiginlegur kvöldverður á laugardagskveldinu og svo var kráar-menningin í Óðinsvéum skoðuð. Við vorum svo heppin að fá gistingu hjá heiðursparinu Albert og Siggu – eins og svo oft áður. Takk kærlega fyrir okkur!

Alltaf gott að kúra með Söru Bergdísi.

Helgina eftir skelltum við okkur norður í land að heimsækja Inga, frænda hans Magga þar sem hann fór með okkur í útsýnisrölt um bæinn sinn Thisted auk þess sem við nutum góðra veitinga hjá honum.

Í lok október fór ég síðan í helgarferð til Íslands en tilefnið var hvorki meira né minna en tvöföld skírn en það voru synir bræðra minna sem fengu fallegu nöfnin Róbert Kristian og Pétur þannig að nú þarf ekki lengur að kalla þá sæta frænda eldri og sæta frænda yngri. Þrátt fyrir að þetta hefði verið stuttur tími þá var yndislegt að komast aðeins til Íslands og hitta fjölskyldu og vini og sérstaklega að fá að knúsa litlu pjakkana mína enda ekki svo oft sem ég fæ að gera það þar sem við systkinin erum búin að dreifa okkur hér á Norðurlöndunum.

Stoltir foreldrar með ungana sína - Eliisa, Freyr, Róbert Kristian, Pétur, Björk og Alfreð.

Við Matti stóðum okkur einstaklega vel sem skírnarvottar Róberts Kristians - þó ég segi sjálf frá! Það er vonandi að við stöndum okkur jafnvel í því að uppfylla kristilegar skyldur okkar í framtíðinni.

Alfreð stoltur með Pétur sem steinsofnaði í skírninni.

Róbert Kristian með stoltum föður og öfum.

Hér má sjá ömmuna reyna að róa Pétur sem var orðinn frekar lúinn eftir viðburðarríkan og gestkvæman skírnardag.

Viltu vinna milljón?

2006-10-11T20:32:00.000+02:00

Fékk þetta skemmtilega bréf frá Spáni í póstinum í morgun (ekki e-mail, heldur gamla góða bréfapóstinum):

Award notification

This is to inform you of the release of the LA PRIMITIVA LOTTERY PROMOTIONS PROGRAM held on the 27th of September 2006. You have been approved a payment of 615,810.00 EURO in cash. This is from a total cash prize of 9.237.150.00 EURO shared among the (Fifteen international winners in this category) CONGRATULATIONS!!!

Your fund is now deposited with a security company insured in your name. Due to false practices, we ask that you keep your award information strictly from public notice,until your claim has been processed and money remitted to your possession as this is part of our security protocol to avoid double claiming or unwarranted abuse of this program by unscrupulous individuals.

Svo í lokin er ég beðin um að gefa upp þessa "almennu" upplýsingar um mig (heimilisfang, staða, símanúmer og banka-reikningsnúmer) og nánasta aðstandanda sem og ég gerði auðvitað samviskusamlega og skellti í póst. Meðan ég gerði það þá fór ég nú að velta því fyrir mér að það væri skrýtið að fá lottó-vinning þar sem ég hafði nú aldrei tekið þátt en ég var fljót að hrista þá hugsun frá mér. Við hjónin ákváðum svo bara að láta slag standa og keyptum okkur sumarhús á Aruba og er planið að fagna jólunum þar í ár - allir velkomnir!!!

And the winners are......dudududumm!!!

2006-10-01T11:53:00.000+02:00

Það eru komnir sigurvegarar í keppninni sætustu frændurnir en það eru septembertöffararnir Hr. Freysson og Hr. Alfreðsson. Seinni frændi vildi nú ekki láta bíða alltof lengi eftir sér svo hann snaraði sér í heiminn 18. september þannig að það eru einungis 12 dagar á milli þeirra. Mikið hlakka ég til að fá að sjá þá og knúsa þá og láta þá vita hver sé uppáhaldsfrænkan þó að ég viti að Ylfa muni veita mér harða keppni um titilinn hjá öðrum þeirra en hjá hinum er þetta alveg öruggt!

Sæti frændi Freysson nýkominn í heiminn

Það er bara komin október og komin ný mynd á Ágústu-dagatalið okkar. Það má með sanni segja að tíminn líður alltof hratt. Ég er núna búin að vera 4 vikur í skólanum og mér finnst bara eins og ég hafi byrjað í gær. Verkefnin eru farin að hellast yfir okkur og akkúrat núna á ég að vera skrifa verkefni um kenningu sem franski heimspekingurinn Michel Foucault setti fram á síðustu öld. En eins og kannski sjá má þá fannst mér núna vera alveg upplagður tími til að skella inn einni bloggfærslu :-) Alveg ótrúlegt hvað maður finnur sér alltaf að gera þegar maður á að vera að læra.

Álfheiður var hjá okkur um síðustu helgi og það var alveg frábært – ekki skemmdi heldur fyrir allt íslenska nammið sem hún kom með (kjamms kjamms). Við Sophie tókum á móti henni á lestarstöðinni á föstudeginum og um kvöldið komu Hjalli og Tóti (grúppufélagar Magga) og borðuðu með okkur auk þess sem að Soffía og Jón litu í heimsókn. Á laugardeginum voru Árósar teknir með trompi eða á ég heldur að segja að H&M hafi verið tekið með stæl auk þess sem að nokkrar fleiri búðir fengu svona að slæðast líka með til að krydda upp á flóruna. Á sunnudeginum var tekinn rúntur um helsta nágrenni Horsens, gengið upp á Himmelbjerget og Sukkertoppen og hádegismatur í Silkeborg. Á mánudaginn skoðuðum við Horsens og um kvöldið kíktum við í heimsókn til Söruh og Jakobs og spiluðum Sequence við þau og foreldra Söruh. Síðan skutlaði ég Álfheiði á lestarstöðina á þriðjudagsmorgninum áður en ég fór í skólann og var það mikill söknður að sjá á eftir henni :-(

Shop til we drop!! Spurning hvað Jóhann segir um þetta..

Álfa komin upp á Himmelbjerget

Við vinkonurnar á leiðinni á Sukkertoppen....

...og komnar á toppinn!

Maggi tók þátt í golfmóti Íslendingafélagsins í gær en náði nú ekki í nein verðlaun í þetta skiptið. Þetta var síðasta golfmót sumarsins og því var haldið grillpartý eftir að mótinu lauk. Ég ákvað nú að taka ekki þátt í mótinu því ég vildi nota tímann til að læra (hóst*) en fór og hitti liðið í matnum eftirá.

Best að fara að skella sér í lærdóminn, þessi skrif gerast víst ekki af sjálfum sér!

Faster Stína

2006-09-17T13:05:00.000+02:00

Kominn tími á smá skrif – Stærstu fréttirnar eru að ég er orðin föðursystir. Litli sæti frændi Alfreðsson fæddist 6. september eftir að hafa látið bíða eftir sér í 12 daga. Hann átti að koma í heiminn á afmælisdeginum mínum en ákvað frekar að fæðast á afmælisdegi Kristjáns langafa síns.

Svo er bara að bíða eftir að næsti sæti frændi komi í heiminn en Freyssonur á að fæðast 1. október eða þá er allavega Eliisa mágkona sett, spurning hvenær hann ákveður að láta sjá sig!

Ég er búin að vera núna 2 vikur í skólanum og líst bara vel á. Það eru einungis 3 fög á þessari önn en það verður heilmikill lestur auk nokkurra verkefna þannig að ég hef nú engar áhyggjur af því að hafa ekki nóg að gera. Það er kominn nokkur tími síðan ég var síðast í skóla (2 ½ ár) þannig að það tekur smá tíma og þó nokkuð átak að komast sér í lærdómsgírinn, að sitja yfir bókunum í marga klukkutíma. Þetta er ekkert eins og þegar ég var í dönskuskólanum í vor þar sem maður rumpaði heimalærdómnum (ef hann var einhver) af á innan við klukkutíma.

Á föstudaginn fórum við og fengum okkur nýtt sjónvarp eftir að lá við að það hefði kviknað í því gamla á fimmtudaginn. Það var búið að vera að stríða okkur undanfarna mánuði, oft að slökkva á sér af sjálfsdáðum, það má kannski rekja til þess að það hefur nokkrum sinnum fengið smá skelli (dottið í gólfið) en í fyrradag fóru að heyrast ýmsir konar brestir og blossahljóð og að lokum lagði megna brunalykt upp úr því og þar af leiðandi var það úrskurðað látið.

Hér er búið að vera ágætt veður að undanförnu, 20-24 gráður ekki alveg haustveður eins og maður á að venjast frá Íslandi en ég allavega kvarta ekki, það er frábært að geta mætt í skólann á stuttermabol og berleggjaður í pilsi!

Confessions on a dancefloor - alveg geðveikir tónleikar!! Hér má sjá afmælisbarnið alsælt eftir upplifunina.

Við skelltum okkur á Miðaldahátíð sem var haldin í miðbænum og þar fékk eiginmaðurinn sér þá einu stærstu (og sérkennilegustu!!) pylsu sem ég hef séð.

Svo er ég farin að hlakka mikið til að fá hana Álfu mína í heimsókn en það verður á föstudaginn – can´t wait!!

Hátíðarhöld

2006-08-24T13:30:00.000+02:00

Jæja, í dag er síðasti dagurinn sem ég get sagst vera tuttugu og eitthvað en á morgun er stóri dagurinn. Ég reyni að taka þessu með stóískri ró eins og mín er venja þó að mér sýnist broshrukkunum alltaf vera að fjölga. En til að fagna mínum síðasta degi sem twenty-something verða haldnir tónleikar hér í Horsens með ekki ómerkari listakonu heldur en MADONNU! Ég hlakka ekkert smá mikið til, er núna að hlusta á Like a prayer til að komast í gírinn. Hátíðarhöldin til heiðurs undirritaðri munu halda áfram hér í bænum næstu 2 daga en þá tekur Miðaldahátíðin við sem verður líka mikið húllum-hæ.
Á morgun mun líka gerast annar stórviðburður (vonandi!) en þá er hún Björk mágkona sett og ég reikna auðvitað með því að barnið komi á réttum degi :-) En ef barnið líkist eitthvað föðursystur sinni þá mun stundvísin ekki verða sterkasta hliðin hjá því.

Íslandsferðin hjá okkur var alveg frábær, það var gott að komast aðeins heim og knúsa alla fjölskyldumeðlimi og vini. Afmælispartýið hjá okkur gekk mjög vel og við þökkum kærlega fyrir alla frábæru gjafirnar sem við fengum. Ég vona bara að gestirnir hafi skemmt sér eins vel og við gerðum. Við hlökkum svo til að sjá alla þegar við komum næst til Íslands.

Við á Stokkseyri

Jæja hef þetta ekki lengra í bili, farin að klæða mig í glimmer-stuttbuxurnar og hjólaskautana.

Fjölgun á heimilinu

2006-07-24T18:23:00.000+02:00

Jæja, þá styttist í það að ég hætti að vinna og snúi mér að öðrum verkefnum en það er fyrst og fremst að slappa af í sumarfríinu mínu í ágúst og svo tekur ”alvara lífsins” við í september þegar skólinn byrjar.
Veðurblíðan heldur áfram að leika við okkur þessa dagana, stundum koma spár um rigningu en þær hljóða nú oftast upp á 1 mm og teljast því varla með – maður tekur varla eftir því þegar rigningin kemur.

Nú er María Sif komin og farin og það er spurning hvenær Jótland muni jafna sig á þessari heimsókn og er þá aðallega átt við Horsens og Árósa. Látum þetta bara gott heita um dvöl hennar hér, þeir sem óska eftir frekari fréttum er bent að hafa samband við ferðalanginn sjálfan. En við vonum bara að Færeyingarnir hafi skilað henni heim á klakann heil á höldnu.

Sophie var aftur hjá okkur í pössun um daginn, það er alltaf jafn gaman að hafa hana. Henni finnst líka mjög gaman að vera hjá okkur því að við erum að leika við hana eiginlega allan tímann. Ég hugsa þá oft hvað það væri gaman að eiga hund en ég held að það verði nú ekkert úr því.....samt aldrei að vita, veltur á því hvernig mér gengur að blikka eiginmanninn.

Það hefur fjölgað hér á heimilinu um tvo. Maggi reif upp tjörnina sem var í garðinum hjá okkur og ætlum við að setja niður blóm þar í staðinn. Fyrri eigandi var með gosbrunn og gullfiska í tjörninni og þegar hann flutti héðan þá hefur hann ekki náð öllum fiskunum upp úr tjörninni því að Maggi fann 2 gutta þar. Við skiljum nú ekki hvernig þeir lifðu af veturinn því að okkur sýndist nú að tjörnin væri frosin alveg niður á botn en þetta eru greinilega harðnaglar sem við höfum eignast. Núna eru þeir í bala út í garði en planið er nú að koma þeim í alvöru búr.

Hótel Stína Sigga

2006-07-09T18:03:00.000+02:00

Þá er skólaferli mínum í dönsku lokið, ég fór í prófið í lok júní og fékk strax að vita að ég hefði náð 2 hlutum (hlustun og lesskilningur) prófsins, svo er bara að sjá hvenær þeir senda mér niðurstöðurnar fyrir hinum 2 hlutunum (skriflega og munnlega hlutanum). Það er vonandi að þetta nám dugi manni restina af dvölinni hér í Danaveldi – allavega er ég komin langt fram úr eiginmanninum að tala við innfædda. Reyndar má nú segja að ég sé í munnlegri dönsku þegar ég er í vinnunni þó að það gangi nú svona misvel að skilja og að koma orðunum frá mér.

Gestagangurinn heldur áfram hér í Horsens, sæta fjölskyldan úr Núpalindinni kíkti til okkar í 5 daga heimsókn sem hefði nú alveg mátt vera lengri því dagarnir flugu framhjá okkur. Það var alveg eindæma blíða þá daga sem þau voru hérna enda var garðurinn mikið notaður við ýmis konar leiki á daginn og pallurinn á kvöldin þar sem setið var langt fram eftir nóttu og spilaður Kani.

Ágústa Birna mætt á svæðið.

Feðginin að njóta veðurblíðunnar, í bakgrunni má sjá fína tjaldhúsið hennar Ágústu.

Þorgerður, Sævar, Bjarni Leó og Aron Yngvi komu í mat til okkar og hér má sjá litlu grallarana halda fund í tjaldinu.

Það er alveg yndislegt að fá gesti sem eru svona myndarlegir í eldhúsinu og að grilla.... :-)

Við skelltum okkur í Legoland þar sem við vorum alveg að grillast úr hita milli þess sem við skelltum okkur í leiktækin.

Ragna og Ágústa á fljúgandi ferð.

Ágústa að kveðja Magga.

Guðrún Brynja kíkti svo í ör-heimsókn til okkar á föstudaginn og fór tilbaka í gær. Þó að þetta hafi verið stuttur tími sem hún var hérna þá var hann vel nýttur, mikið masað eins og okkur einum er lagið. En hún er búin að lofa að stoppa lengur hjá okkur næst og þá aldrei að vita hvort hún taki ekki Helga með þá!

Guðrún mætt með bjór í hönd.

Svo var tekin þessi fína mynd "brúðkaupsmynd" af okkur skvísunum!

Svo er það bara næsti gestur sem kemur til okkar annað kvöld en það er hún María Sif, litla systir. Við Maggi erum einmitt að spá í að skella okkur til Þýskalands á morgun til að ná í birgðir svo við verðum vel undirbúin fyrir komu hennar hingað!!

Helstu atburðir júnímánaðar

2006-06-26T11:43:00.000+02:00

Sophia og Einar komu til okkar 2. júní eftir að hafa verið búin að vera 2 nætur í Kaupmannahöfn. Við keyrðum með þeim til Ribe og Rømø og við þrjú fórum saman til Randers og skoðuðum þar regnskóg sem er búið að búa til þar með plöntum og dýrum frá Afríku, Asíu og S-Ameríku. Maggi var á fullu í skólanum að klára lokaverkefnið sitt þannig að hann komst ekki með. Einnig skoðuðum við Horsens og nágrenni bæjarins.

Sophia í Juelsminde

Verið að skoða dýrin í regnskóginum

Svo varð auðvitað að taka mynd af Sophiu hjá pósthúsinu í Ribe.

Daginn fyrir þjóðhátíðardaginn kom Sara Bergdís og gisti hjá okkur. Albert var að útskrifast sem margmiðlunarhönnuður og voru foreldrarnir því í Árósum að halda upp á áfangann – ekkert smá flott hjá stráknum!

Sara að horfa á sjónvarpið í "húsinu sínu" sem hún bjó til sjálf.

Daginn eftir kom önnur skotta í pössun til okkar en hún heitir Sophie og er Golden Retriver-tík (veit ekki hvort þetta sé rétt skrifað...). ”Foreldrar hennar” voru í veislu sem byrjaði um miðjan daginn og stóð fram eftir nóttu.

Þessa sömu nótt og Sophie var hjá okkur komu mamma og pabbi til okkar. Þau lentu seint um kvöldið í Köben og brunuðu svo beint hingað. Við fórum með þeim líka til Ribe og gengum þar um bæinn. Einnig skruppum við til Silkeborgar og gengum upp á Himmelbjerget. Svo má ekki gleyma því að við mamma fórum í velheppnaða verslunarferð til Árósa þar sem kreditkortin fengu gott tækifæri til að sanna gildi sitt!

Blómarósir í Ribe

Komin upp á Himmelbjerget eftir "fjallgönguna miklu"

Annars eru helstu fréttir þær að ég er byrjuð að vinna við heimilishjálp. Ég er búin að vera núna í því í 2 vikur og mér líkar þetta svona ágætlega. Þetta er mjög góð æfing fyrir mig að tala og skilja dönskuna því að flest af þessu fólki sem ég er að hjálpa er í eldri kantinum og það getur því verið erfitt að skilja þau. Ég er líka ennþá í sprog-skólanum og mun taka próf þar á miðvikudaginn og þá er honum lokið.

Á laugardaginn var haldinn sommer-fest í skólanum en þá var farið í Bygholm Park sem er mjög flottur garður hér og grillað saman auk þess sem spilað var badminton og blak en í því síðarnefnda var ég einmitt í sigurliðinu og sýndi snilldartakta þó ég segi sjálf frá...

Núna erum við bara að undirbúa okkur fyrir komu næstu gesta frá Íslandi en Ragna, Árni og Ágústa Birna koma til okkar í lok þessarar viku.

Af því tilefni ákvað ég að skella inn þessari fínu mynd af okkur vinkonunum frá 1985. Takið sérstaklega eftir Henson-gallanum og íshoppunum!

Hitabylgja!

2006-06-14T21:37:00.000+02:00

Síðastliðna daga hefur verið of heitt til að stunda tölvuna, handleggirnir límast við skrifborðið, fingurnir við lyklaborðið og svitapollur myndast við skrifborðsstólinn. Fyrir svona víkinga eins og okkur af norðlægum slóðum hefur þetta verið nánast óbærilegt og stundum við vatnsdrykkju og ísát sem mest við getum enda hefur hitastigið verið frá 25 gráðum á nóttinni upp í 40 gráður á daginn.

Þegar hér var komið við sögu settist Maggi að í ísskápnum!

(Taka skal fram að þessi mynd er tekin í skugga...)

Twenty-something....

2006-06-09T10:48:00.000+02:00

Þegar við fluttum frá Íslandi þá átti ég von á að maður mundi upplifa fullt af nýjum hlutum og það hefur alveg gengið eftir. Maður lærir nýtt tungumál (eða rifjar það upp síðan maður lærði það í skóla!), kynnist fullt af fólki alls staðar að úr heiminum og aðlagast nýju samfélagi sem er að mörgu leyti líkt því sem maður kom frá en að mörgu leyti líka mjög ólíkt. En aldrei átti ég von á því að það að flytja erlendis mundi yngja mig! Þegar ég tala við samnemendur mína í sprog-skólanum og minnist á eiginmann minn þá verður fólk oft gáttað á því að ég skuli vera búin að gifta mig svona ung! Hér halda flestir að ég sé 23 - 24 ára (sem er svo sem ekki slæmt í sjálfu sér :-). Þannig að ég mæli með þessu við sem flesta – flytja erlendis til að yngja sig upp. Kannski ég ætti að fara að huga að því að flytja eitthvert annað þegar ég verð fertug svo ég geti þá talist vera þrítug!

Blautt blautara blautast

2006-05-25T15:57:00.000+02:00

Það má heldur betur segja að maímánuður hafi byrjað vel, algjör bongóblíða en það stóð nú bara yfir í rúma viku. Síðastliðnar 2 vikur er svo búið að vera monsún-tímabil hér á Jótlandi, endalaus rigning og leiðindaveður og það virðist nú ekkert ætla að fara að breytast. En maður verður víst að ylja sér við minninguna um þessa sólarviku og halda í vonina að góða veðrið muni láta sjá sig aftur.

Fyrstu helgina í maí skruppum við til Óðinsvéa (fyrsta ferðalag nýja bílsins) en þar vorum við boðin í matarboð hjá Albert og Siggu. Þar voru einnig Hjalti og Jóhanna og auðvitað skotturnar tvær, Leonóra og Sara Bergdís. Grillunin á kjötinu klikkaði “aðeins” en það skipti engu máli því að við fengum í staðinn dýrindis pylsur með gómsætu meðlæti, góðum drykkjarveigum og ekki spillti félagskapurinn fyrir – alveg stórskemmtilegt kvöld.

Albert grillmeistari að störfum.

Við hin höfðum það huggulegt á pallinum á meðan.

Við gistum síðan hjá Alberti og co og buðu þau okkur upp á íslenska súkkulaðisnúða í hádegismat. Eftir það kíktum við í heimsókn til Þorgerðar og Sævars þar sem við fengum kryddbrauð og súkkulaðisnúða! (Öðruvísi tegund að vísu.) Kl. 18 brunuðum við aftur til Horsens því við vorum boðin í kvöldmat til Rúnars og Fanneyjar og sátum við þar síðan og spjölluðum fram eftir kvöldi.

Eins og sjá má vöktu snúðarnir hjá Þorgerði mikla lukku hjá öllum - nema hjá Aroni Yngva sem fékk ekki að smakka og hallaði því bara undir flatt.

Maggi að setja saman grillið sem hann fékk í afmælisgjöf.

Síðan borðuðum við úti...

... enda ekki hægt annað þegar hitastigið á pallinum var 30 gráður! :-)

Ingi frændi hans Magga kom í heimsókn um síðustu helgi frá Thisted. Maggi kynnti honum aðeins hvernig skólalífið er í Vitus Bering með því að fara með hann á Skólabarinn og ég held að hann greyið Ingi hafi fengið menningarsjokk yfir hvað þetta skólalið gat drukkið mikið en samt er hann nú búinn að búa í Danmörku í 4 ár. Frændurnir fóru síðan á Kim Larsen tónleika á föstudaginn en hann var að spila á tónlistarhátíð hér í bænum með fullt af hljómsveitum – Open Air Horsens. Verst hvað það rigndi mikið allan tímann sem Ingi var hjá okkur.

Við skötuhjúin erum búin að vera á 5 vikna golfnámskeiði og í gærkvöldi átti að vera síðasti tíminn þar sem átti að taka stuttan hring um golfvöllinn. En því var frestað vegna þess að kennarinn þurfti að mæta í partý þannig að það er ekki alveg komið á hreint hvenær við munum “útskrifast” af námskeiðinu.

Þetta er ljúft líf...

2006-05-04T22:19:00.000+02:00

Hér er heldur betur komið sumarveður, búið að vera sól og rúmlega 20 stiga hiti og er sama veðri spáð hér fram yfir helgi. Við erum búin að kaupa okkur bíl, glæsikerru af tegundinni Nissan Primera árgerð 1993 sem telst nú bara vera bíll á besta aldri hér í Danmörku. Við erum ekki ennþá búin að nefna hann formlega en þessa tvo daga sem við erum búin að eiga hann hefur hann gengið undir nafninu "danske lille rød" sem er skírskotun til Fiatsins hennar mömmu sem stundum er kallaður litli rauður. En allar tillögur eru vel þegnar!

Við héldum partý á laugardaginn til að fagna þrítugsafmælis húsbóndans og mættu um 20 manns. Hér var þrusustuð og m.a.s. farið í drykkjuleik sem fólk slapp misvel frá. Við reyndar misreiknuðum eitthvað áfengisþorsta gestanna, keyptum alltof mikið og sitjum núna uppi með slatta af bjórkössum en ég hef nú svo sem grun um að þeir muni ekkert skemmast hjá okkur.

Ég er búin að fá jákvætt svar frá háskólanum í Árósum og byrja þar í september þannig að planið hjá mér núna er að vera í dönskuskólanum út júní, fá vinnu hér í júlí (er að vinna í þeim málum) og kíkja svo til Íslands í ágúst áður en skólinn byrjar.

Svo er það síðastu fréttirnar en alls ekki þær sístu en það er að við erum komin með miða á MADONNU!! Þurfti bara að bíða í röð í 4 klukkutíma :-) Jíha!

Pappírsbrúðkaup

2006-04-23T13:20:00.000+02:00

Það má segja að tíminn líði hratt en í dag er 1 ár liðið síðan Maggi skuldbatt sig löglega til að taka við mér og ég varð frú Stína. Við ætlum að fara út að borða í kvöld til að halda upp á tilefnið en annars er nú ekki mikið á dagskrá hjá okkur í dag annað en að njóta dagsins.

Gleðilegt sumar!

2006-04-20T17:59:00.000+02:00

Jæja, það er komið langt síðan ég skrifaði síðast og sumir farnir að ýta á eftir því! Það er búið að vera margt í gangi hjá okkur síðustu vikurnar. Á föstudaginn fyrir viku síðan var haldinn alþjóðlegur dagur í dönsku-skólanum. Kennslustofurnar voru skreyttar með þjóðfánum allra nemendanna, boðið var upp á margs konar skemmtiatriði og svo var hægt að gæða sér á mjög fjölbreytilegum mat – bæði góðum og vondum. Ég bauð nú bara upp á kúlusúkk en aðrir lögðu meiri vinnu á sig eins og sjá má á myndinni.

Hér má sjá nokkrar fleiri myndir frá deginum

Ég og Sarah frá Bandaríkjunum

Ég og Ivana frá Serbíu

Daginn eftir kíktu síðan Albert, Sigga og Sara Bergdís í kaffi til okkar og á sunnudeginum komu Hjalti, Jóhanna og Leonóra í kvöldmat.

Leonóra var mjög fjörug eftir matinn og tók okkur Magga í smá danskennslu.

Á þriðjudaginn í síðustu viku héldum við síðan til Stokkhólms og vorum komin þangað um tíuleytið um kvöldið eftir 8 tíma lestarferð og smá stoppi í Kaupmannahöfn. Við dvöldumst hjá Alfreð og Björk í góðu yfirlæti í 6 daga. Á miðvikudeginum komu Lillemor og Janne og borðuðu hangikjöt með okkur sem ég held að þau hafi verið mjög hrifin af. Á fimmtudeginum hittum við Gulla og Söndru og skelltum okkur með þeim á rokka-billy kaffihús þar sem allt var í 50´s stíl.

Föstudagurinn fór í gönguferðir um Södermalm, Gamla Stan og Vasastan sem allt var mjög skemmtilegt að skoða.

Við mágkonurnar í göngutúr

Hér má sjá glitta í okkur Magga að ganga
Á laugardaginn skelltum við okkur í bátsferð út í Sandö sem er eyja í skerjagarðinum en þar er mjög sætur lítill bær sem kallast Sandhamn. Við fengum alveg frábært veður með glampandi sól og röltum við um eyjuna og flatmöguðum í sólina (þar sem freknurnar fengu smá þjófstart fyrir sumarið) auk þess að borða góðan mat.

Björk í Sandhamn

Rákumst á þessa “veglegu” styttu í Sandhamn

Á leiðinni tilbaka eftir skemmtilegan dag.
Á páskadag komu Gulli og Sandra og borðuðu með okkur en þá buðu Björk og Alfreð upp á lambalæri sem hafði verið smyglað til þeirra frá Íslandi auk orabauna og svo var súkkulaðikaka (a la Sandra) með rjóma og páskaegg í eftirrétt – allt alveg hrikalega gott.

Efti matinn tók Gulli nokkra góða gítartakta.

Kvöldinu lauk síðan með smá bumbu-samanburði.
Við héldum tilbaka á mánudagsmorgninum og þar var tekið 3 klst. stopp í Köben og fórum við þá út að borða með Valla….. nei ég meina Davíð.

Confessions Tour

2006-04-04T09:21:00.000+02:00

Vá, ég var að sjá það á netinu að Madonna verður með tónleika í hér í Horsens 24. ágúst! Það verður nú örugglega algjört brjálæði að fá miða á þá en ég ætla samt að reyna, það væri frábær afmælisgjöf að fá að sjá Madonnu á sviði live :-)

Við fórum í partý á laugardaginn til Soffíu og Nonna sem búa hérna rétt hjá okkur á Stensballe, þar voru samankomnir margir Íslendingar og var mikið talað og mikið hlegið. Svo var skundað á Íslendingaball á Skólabarnum en litla ég var nú orðin þreytt þá og rölti bara heim. Eiginmaðurinn skellti sér á ballið með hinum og var ekki komin heim fyrr en kl. 3:30 - það gekk víst eitthvað erfiðlega að fá taxa heim.

Það styttist í páskafríið hjá okkur, það eru bara eftir 3 skóladagar hjá mér því að á föstudaginn er alþjóðlegur dagur í skólanum með tilheyrandi húllum-hæi og þá er enginn kennsla. Síðan fer ég í próf á mánudaginn og við förum til Stokkhólms á þriðjudaginn.

Farin.... og komin tilbaka

2006-04-02T15:17:00.000+02:00

Ég skrapp í heimsókn til Íslands um daginn til að fara í jarðarför. Þetta var stutt stopp, einungis 6 dagar en þrátt fyrir stuttan tíma þá náði ég að gera ýmislegt eins og t.d.
* Fara þrisvar út að borða.
* Fara tvisvar í matarboð.
* Mæta í þrítugsafmæli hjá gömlum æskuvini úr Ásbúðinni (sem boðflenna).
* Kíkja í Smáralindina með Rögnu og Ágústu Birnu
* Heilsa upp á ömmu og Jóhönnu tengdaömmu.
* Fara í nokkrar heimsóknir.
* Skoða nýja húsið sem Freyr og Eliisa voru að kaupa í Kópavogi.
* Fara í klippingu.
* Kíkja í heimsókn til sýsla.
* Og auðvitað að njóta alls þess góða sem Hótel Mamma hefur upp á að bjóða.
Því miður náði ég ekki að hitta alla sem ég hefði viljað en úr því verður vonandi bætt þegar við kíkjum til Íslands í ágúst.

Heimferðin frá Íslandi gekk ágætlega fyrir utan að þegar ég kom í Leifsstöð þá mætti mér sú allra lengsta tjékk-inn-röð sem ég hef séð og fór því dágóður tími í bið en það var dýrmætur tími sem ég ætlaði að nýta í fríhöfnina. Þannig að ég rétt náði að kíkja þar og fara í Kaffitár til að taka með rúnstykki og trópí því ég var orðin glorhungruð. Síðan þegar ég er að taka stefnuna út í vél þá fer ég að spá í hvað ég hafi gert við brottafararspjaldið og vegabréfið og gat hvergi fundið það. Hljóp því aftur í Kaffitár og viti menn, í öllu stressinu hjá mér hafði ég gleymt því þar. En svo þegar ég var komin út flugvél þá varð nú 25 mínútna seinkun því það var verið að bíða eftir farþegum úr tengiflugi þannig að ég hefði nú ekki þurft að drífa mig svona mikið! En fyrir utan það þá gekk ferðin vel og Danmörk tók “fagnandi” á móti mér með rigningu þrátt fyrir að ég hefði lagt það sérstaklega á mig að fá mér rauðar strípur til heiðurs danska fánanum.

Stutt fréttaskot

2006-03-22T09:04:00.000+01:00

Hér er sólin aðeins farin að láta sjá sig, um síðustu helgi var 8-9 stiga hiti. Af því tilefni skelltum við okkur í smá garðvinnu á sunnudaginn, hreinsuðum þakrennurnar á bílskýlinu og rökuðum eitthvað af laufunum í garðinum, Reyndar er litla "tjörnin" okkar ennþá frosin þannig að við þurfum að bíða smá eftir að láta gosbrunninn í gang.

Við fórum í hjólatúr á laugardaginn, ég vildi endilega sýna Magga göngustíginn sem ég hafði fundið um daginn sem er meðfram sjónum upp í hverfið okkar - Stensballe. Hér má sjá nokkrar myndir frá þeirri ferð.

Brrrrr.....það er kalt.....

2006-03-12T19:50:00.000+01:00

Svo að ég röfli nú aðeins meira um veðrið hérna þá er búið að vera skítakuldi hjá okkur í nokkra daga, 2-3 stiga frost og rok. Um daginn þegar ég var að hjóla heim úr skólanum meðfram sjónum þá leið mér eins og ég væri á Íslandi - alveg að frjósa! Svo var sérstaklega gaman að fá tölvupóst frá mömmu þar sem hún sagði að það væri búið að vera blíðskaparveður á Íslandi í marga daga. En sem sagt núna er búið að seinka vorinu hérna þangað til í apríl – ég allavega rétt svo vona að það komi þá!!

Ég er komin í nokkurs konar stúdentaráð í sprog-skólanum og við erum núna að undirbúa International dag sem verður haldinn í skólanum í byrjun apríl en þá eiga allir að koma með þjóðlega rétti og sýna myndir frá sínu heimalandi. Það verður vonandi gaman.

Um síðustu helgi fórum við í partý á Onsdags-barnum – já Guðrún Brynja, hann er greinilega til í fleiri löndum!! Það var tvöfalt tilefni fyrir partýinu en skólafélagi Magga, Böddi var 35 ára og Rakel, konan hans var að útskrifast úr snyrtifræði. Það var mikið fjör þarna og mikið af bjór enda ekki við af öðru að búast þegar Íslendingar koma saman í útlöndum. Eins og sjá má var ég stillt og settleg í partýinu eins og mín er von og vísa en Maggi lék lausum hala á dansgólfinu.

Í gær leigðum við okkur bíl og skruppum til Árósa þar sem fjárfest var í hillu í Ikea og pantaður svefnsófi í Ilvu. Okkur var sagt að sófinn yrði sendur til okkar eftir 2 vikur en ætli megi ekki reikna frekar með 3-4 vikum, miðað við hvernig hraðinn er á mörgu hér í Danmörku. Við vorum einnig næstum því búin að kaupa garðhúsgögn í Jysk en þau voru ekki til á lager og miðað við hvernig veðrið er núna þá liggur nú ekkert á að fjárfesta í svoleiðis!

Snjór, snjór, snjór.....

2006-03-02T09:10:00.000+01:00

Margir hérna í Danmörku voru búnir að segja við mig að vorið byrjaði hér í mars og þá ætti að fara að hlýna þannig að ég er búin að bíða spennt eftir marsmánuði þegar ég gæti hent kuldaskónum og húfunni inn í geymslu og tekið fram sandalana og sólhattinn. En nei, bæði í gær og í dag er búið að snjóa og skv. veðurspá á að vera snjór fram yfir helgi. Bikiníið verður því víst að bíða betri tíma.....

Alfreð var hjá okkur um síðustu helgi og höfðum við það mjög náðugt. Þeir Maggi fóru saman í göngutúr um bæinn á föstudaginn meðan ég var í skólanum og svo fórum við út að borða á Oksen um kvöldið og borðuðum þar dýrindis steik. Á laugardeginum byrjuðum við á því að fara aftur í bæinn og fengum okkur "brunch". Síðan var rölt meira um bæinn og kíkt í Bilka (að sjálfsögðu!!) áður en haldið var aftur heim á leið. Um kvöldið eldaði ég fyrir okkur gráðosta-kjúkling og síðan horfðum við á American Idol og drukkum bjór. Alfreð tók svo lestina heim um hádegi á sunnudeginum. En við munum nú hittast fljótt aftur því við Maggi erum búin að panta ferð til Stokkhólms um páskana og verðum þá hjá Alfreð og Björk í 6 daga.

Við systkinin að bíða eftir strætó

Eins og kannski margir vita þá horfum við Maggi frekar mikið á sjónvarp og höfum gaman af. Sumir (t.d. foreldrar mínir) mundu jafnvel ganga svo langt að segja að við séum sjónvarpssjúklingar en það er náttúrulega bara þeirra skoðun! Þið getið því ímyndað ykkur hvað við fengum mikið áfall þegar sjónvarpið okkar var næstum því búið að enda lífdaga sína á sunnudaginn. Við fengum í heimsókn til okkar Þorgerði, Sævar og strákana þeirra Bjarna Leó og Aron Yngva. Bjarni Leó hefur mjög gaman af því að príla upp á hluti og hann sá að sjónvarpið væri eitthvað sem tilvalið væri að komast upp á. Hann dró því út skúffuna sem er fyrir videóspólur og klifraði upp á en þá fór vogaraflið að virka og allt fór að falla fram. En Sævar sýndi ótrúleg tilþrif og náði að grípa tækið og minnka þannig fallið. Bjarni Leó meiddi sig sem betur fer ekki en sjónvarpið fór aðeins í sundur og það kom smá dæld í parketið. Allir fengu nett áfall og í huga mér flugu fram minningar af þeim gleðistundum sem við hjónin höfum átt fyrir framan sjónvarpið síðastliðin 5 ár. En sjónvarpið virkar allavega og vonandi verður hægt að laga það sem fór í sundur.

Hér má sjá litla sjónvarpsskelfirinn......

.... og Aron Yngvi litli bróðir alltaf jafnhissa :-)

Gestagangur

2006-02-21T16:08:00.000+01:00

Við fengum góða gesti til okkar um helgina, Albert, Sigga og Sara Bergdís komu í heimsókn frá Óðinsvéum á sunnudaginn og borðuðu með okkur kvöldmat. Það var gaman að hitta þau og góð tilbreyting frá því að borða bara alltaf tvö ein.
Sara var sannkölluð hjálparhella, sniglaðist í kringum okkur við eldamennskuna og vildi endilega hjálpa okkur við að setja í þvottavélina, þá aðallega bangsann sinn sem hefur örugglega ekki fundist það vera góð hugmynd! Svo eftir matinn þá tók hún að sér að endurraða videóspólunum í hillunum hjá okkur, það er ekki slæmt að fá aðstoð frá svona dugnaðarforki í heimilisstörfin.

Nú styttist í Alfreð komi í heimsókn til okkar frá Stokkhólmi. Hann kemur á fimmtudagskvöldið og fer aftur á sunnudag. Það verður gaman að sýna honum húsið okkar og fara með honum rúnt um bæinn - þó að hann haldi því fram að það taki bara korter að skoða bæinn!

Heil og sæl veri fólkið!

2006-02-15T14:42:00.000+01:00

Lífið hér á Jótlandi gengur sinn vanagang. Fyrstu vikurnar eftir að við komum hingað fóru að mestu í að koma okkur fyrir og að redda öllu sem þarf að gera þegar maður er nýbúi í Danmörku. Það fyrsta sem við rákum okkur á var að hér tekur allt mun lengri tíma heldur en á Íslandi, t.d. þurftum við að bíða í 2 vikur eftir að fá internet-tengingu heim. Einnig var okkur sagt að það mundi taka 2 vikur að fá danska kennitölu en það tók nú bara nokkra daga. Það gæti að einhverju leyti tengst því að ég gekk ansi hart eftir því að fá þetta sem fyrst - hringdi nokkrum sinnum og mætti svo bara aftur á svæðið......en það hafðist allavega fyrir rest. Annað dæmi sem má nefna um hvað Danirnir eru "ligeglad" eru ruslamálin hjá okkur. Þegar við tókum við húsinu okkar þá var fyrri eigandi svo elskulegur að skilja ruslatunnuna okkar eftir fulla og biðum við því í 2 vikur eftir að sjá ruslakallana koma. Þegar ekkert bólaði á þeim þá fórum við í kommúnuna og spurðumst fyrir um málið. Þar var okkur sagt að það hefði verið svo slæmt veður daginn sem átti að taka ruslið okkar þannig að það yrði ekki komið fyrr en eftir aðrar 2 vikur að taka það sem þýddi að ruslið safnaðist fyrir hjá okkur í 1 MÁNUÐ!! Auk þess veltum við því fyrir okkur hvenær þetta slæma veður hefði verið því það fór alveg framhjá okkur.........

Maggi er byrjaður á fullu í skólanum en ég er núna í vikufríi úr dönskunáminu. Ég ætlaði mér í þessari viku að skrifa svokallað "inspiration letter" sem á að fylgja umsókninni minni til háskólans í Árósum en það gengur mjög hægt. Andinn virðist ekki koma yfir mig og það er kannski ástæðan fyrir því að ég fór að gera þetta blogg. Ég þori ekki að lofa hve dugleg ég verð að skrifa hérna inn en ég skal gera mitt besta.